सापळे

एखादी अभद्र कृती

नासवून टाकते सगळं.

प्राप्त परिस्थितीवरची

साधी एक प्रतिक्रिया;

पण होतं नव्हतं ते सारं

एका क्षणात पुसून जातं.

समोरून आलेला एक वार

तलवारी ऐवजी ढालीवर

पेलता आला असता तर...!

तर ही सगळी क्रूरता

अशी वर आली नसती.

मागे वळून पहाताना

लाज वाटत रहाते

कुठून आली, कुठे दडलेली

इतकी बिभत्सता???

सुसंस्कृततेचे सगळे लेप

खळाखळ आपल्या पायाशी

ढलप्यांनी पडत रहातात.

अन आपण सारेच खुजे होत

त्या ढलप्याच्या ढिगाऱ्यात

हळूहळू सापळे बनत जातो...