सांग ना ,
असं का व्हावं आपल्या भेटीत!
तुझ्या गाडीचा तो धुंद वेग
माझ्या केसातला गंधीत मरवा
नागमोडी रस्त्याची मायावी वळणं
घनदाट झाडांची वेडी माया
सांग ना ....
तुझ्या डोळ्यातली स्वप्न
मलाही दिसावीत
माझ्या मनातल्या चांदण्यानी
तुझेही डोळे निवावेत
सांग ना...
तनामनातून आलेले तुझे शब्द
भावनांनी ओथंबलेले माझे सूर
अस्वस्थ करणारी तुझी नजर
आवर ना म्हणणारी माझी वीज
सांग ना ...
वाळूवर उमटणारी भरीव गाज
हेलावून टाकणारी शिवरंजनी
हवीहवीशी वाटणारी बोलकी शांतता
भरभरून कोसळणारी थरथरती तृप्तता
सांग ना...
No comments:
Post a Comment